November 15, 2026 
தண்டோரா குழு
கோவை காரி மோட்டார் ஸ்பீட்வேயில் சிடிஆர்-ஜேகே டயர் இந்திய தேசிய கார் பந்தய சாம்பியன்ஷிப் 2026-ன் இரண்டாவது சுற்று சனிக்கிழமை விறுவிறுப்பாகத் தொடங்கியது. முதல் நாளிலேயே கடைசி சுற்றுப் போராட்டங்களும், த்ரில் வெற்றிகளும் ரசிகர்களை உற்சாகப்படுத்தின.
எஃப் 1300 நோவிஸ் கோப்பை: மிகவும் பரபரப்பாக நடந்த இப்போட்டியில், 5-வது இடத்திலிருந்து பந்தயத்தைத் தொடங்கிய அகஸ்டின் பாபி (DTS ரேசிங்) சிறப்பாக ஓட்டி, ஷத்வீர் ஷெட்டியை வெறும் 0.032 வினாடிகள் வித்தியாசத்தில் வீழ்த்தி த்ரில் வெற்றி பெற்றார். பிரணவ் ராமசாமி 3-வது இடம் பிடித்தார்.எல்ஜிபி ஃபார்முலா 4: 15 சுற்றுகள் கொண்ட இப்பந்தயத்தில், கடைசி இரண்டு சுற்றுகள் இருந்தபோது சக அணி வீரர் ஆர்யா சிங்கை முந்தி மெஹுல் அகர்வால் (டார்க் டான் ரேசிங்) முதலிடம் பிடித்தார். துருவ் கோஸ்வாமி 3-வது இடம் பெற்றார். புதுமுக வீரர்கள் பிரிவில் ஆதித்யா பட்நாயக் முதலிடம் பிடித்தார்.
ராயல் என்ஃபீல்டு கான்டினென்டல் ஜிடி கோப்பை: அமெச்சூர் பிரிவில் இரண்டு முறை போட்டி நிறுத்தப்பட்டாலும், கபீர் சஹோச் சிறப்பாக ஓட்டி சௌரவ் சஞ்சய் டேயை வீழ்த்தி வெற்றி பெற்றார். கடைசி சுற்றில் ஏற்பட்ட மோதலால் பிராண்டன் டிசோசா 3-வது இடம் பிடித்தார். புரோ பிரிவில் பெங்களூரு வீரர் அனிஷ் ஷெட்டி எளிதாக முதலிடம் பிடிக்க, செந்தில் குமார் 2-வது இடமும், நவநீத் குமார் 3-வது இடமும் பெற்றனர்.
ஜேகே டயர் லெவிட்டாஸ் கோப்பை: ஜென்டில்மேன் பிரிவில் மும்பை வீரர் பிரதீக் சோனாவனே இரண்டு பந்தயங்களிலும் முதலிடம் பிடித்து இரட்டை வெற்றி பெற்றார். அதேபோல், புதுமுக வீரர்கள் பிரிவில் கவீன் ராஜபக்சே இரண்டு போட்டிகளிலும் வென்று அசத்தினார்.சூப்பர் சலூன் & டூரிங் கார்ஸ்: இந்தியன் சூப்பர் டூரிங் கார்ஸ் பிரிவில் அர்ஜுன் நரேந்திரன் முதலிடமும், பிரேன் பிதாவாலா 2-வது இடமும், அர்ஜுன் பாலு 3-வது இடமும் பிடித்தனர். இந்தியன் டூரிங் கார்ஸ் பிரிவில் பாலபிரசாத் ஏ முதலிடம் பெற்றார்.
இந்தியன் ஜூனியர் டூரிங் கார்ஸ்: முதல் பந்தயத்தில் ஸ்ரீனிவாஸ் தேஜா வெற்றி பெற்றார். இரண்டாவது பந்தயத்தில், கடைசி சுற்றில் ஏற்பட்ட விறுவிறுப்பான போட்டியில் தேஜாவை முந்தி தீபக் ரவிகுமார் 0.308 வினாடிகள் வித்தியாசத்தில் த்ரில் வெற்றி பெற்றார்.சூப்பர் ஸ்டாக்: இப்பிரிவில் நடந்த இரண்டு பந்தயங்களிலும் தில்ஜித் டி.எஸ் முதலிடம் பிடித்து இரட்டை வெற்றியைப் பதிவு செய்தார்.
For English News
