October 29, 2026 
தண்டோரா குழு
சிறுதுளி அமைப்பு, 2003 ஆம் ஆண்டு முதல் கோயம்புத்தூரில் நீர்வளப் பாதுகாப்பு மற்றும் நீர்நிலைகள் புனரமைப்பை முதன்மை நோக்கமாகக் கொண்டு பல்வேறு சுற்றுச்சூழல் பாதுகாப்புப் பணிகளை மேற்கொண்டு வருகிறது. நீர் பாதுகாப்பு, மரம் நடுதல், கழிவு மேலாண்மை, சுற்றுச்சூழல் விழிப்புணர்வு மற்றும் விவசாயிகளின் மேம்பாடு உள்ளிட்ட பல்வேறு திட்டங்களை அரசு துறைகள், கல்வி நிறுவனங்கள், பெருநிறுவனங்கள் மற்றும் பொதுமக்களின் ஒத்துழைப்புடன் செயல்படுத்தி வருகிறது.
சிறுதுளி அமைப்பின் முக்கியத் திட்டங்களில் ஒன்றான பசுமைப் பரப்புத் திட்டத்தின் கீழ், இதுவரை 10 லட்சத்திற்கும் மேற்பட்ட மரக்கன்றுகள் நடவு செய்யப்பட்டுள்ளன. மேலும், மாநகராட்சி நிலங்கள், ரயில்வே துறை நிலங்கள், கல்வி நிறுவனங்கள், கிராம ஊராட்சி நிலங்கள் மற்றும் இந்து சமய அறநிலையத்துறைக்குச் சொந்தமான நிலங்கள் உள்ளிட்ட பல்வேறு இடங்களில் 200-க்கும் மேற்பட்ட பசுமைப் பகுதிகள் உருவாக்கப்பட்டுள்ளன. குறிப்பாக, கோயம்புத்தூர் மாநகரம் மற்றும் நகர்ப்புறப் பகுதிகளில் 500 ஏக்கருக்கும் அதிகமான நிலப்பரப்பு பசுமைப் பகுதிகளாக மாற்றப்பட்டுள்ளது. நகரின் பசுமைப் பரப்பை விரிவுபடுத்துவதோடு, சுற்றுச்சூழல் சமநிலையைப் பாதுகாப்பதிலும் சிறுதுளி அமைப்பு தொடர்ந்து பங்களித்து வருகிறது.
மேலும், தமிழக அரசின் ‘பசுமைத் தமிழ்நாடு இயக்கத்தின்’ (Green Tamil Nadu Mission) செயலில் ஈடுபடும் உறுப்பினராகச் சிறுதுளி அமைப்பு இருந்து வருகிறது. இந்து சமய அறநிலையத்துறைக்குச் சொந்தமான நிலங்களில் இதுவரை 80,000-க்கும் மேற்பட்ட மரக்கன்றுகள் நடவு செய்யப்பட்டுள்ளன. இதன் தொடர்ச்சியாக, மேலும் சுமார் 1.5 லட்சம் மரக்கன்றுகளை நடவு செய்வதற்கான சாத்தியமுள்ள நிலங்கள் அடையாளம் காணப்பட்டுள்ளன. இத்தகைய முயற்சிகள் தமிழகத்தின் பசுமைப் பரப்பை அதிகரிப்பதுடன், கோயம்புத்தூர் நகரில் காற்று மாசுபாட்டைக் குறைக்கவும், காற்றின் தரத்தை மேம்படுத்தவும் உதவும்.
கோயம்புத்தூர் மாவட்ட ஆட்சியர் பவன்குமார் ஜி.கிரியப்பனவர் ஆதரவுடன், சிறுதுளி அமைப்பும் பேரூர்–செட்டிபாளையம் ஊராட்சியும் இணைந்து 10-க்கும் மேற்பட்ட பசுமைத் திட்டங்களைச் செயல்படுத்தியுள்ளன.பனை வனம், SPB வனம், ஆரோக்கிய வனம், வித்யாரண்யம் மற்றும் துளிர் வனம் உள்ளிட்ட இத்திட்டங்கள், அப்பகுதியின் பசுமைப் பரப்பையும் பல்லுயிர்ப் பெருக்கத்தையும் மேம்படுத்தி வருகின்றன.
இந்தத் தொடர் முயற்சிகளின் அடுத்த கட்டமாக, பேரூர்–செட்டிபாளையம் ஊராட்சியில், இந்து சமய அறநிலையத்துறையின் கட்டுப்பாட்டில் உள்ள அருள்மிகு பால கணபதி கோயிலுக்குச் சொந்தமான நிலத்தில், கோயம்புத்தூரில் உள்ள அனைத்து ரோட்டரி சங்கங்களின் ஆதரவுடன் ‘ரோட்டரி யுனைட் வனம்’ (Rotary Unite Vanam) என்ற புதிய மரம் நடுதல் திட்டம் தொடங்கப்பட்டுள்ளது. கோயம்புத்தூர் மாவட்டத்தின் பசுமைப் பரப்பை மேலும் விரிவுபடுத்தும் நோக்கில் முன்னெடுக்கப்படும் இத்திட்டம், கோயம்புத்தூரில் உள்ள ரோட்டரி சங்கங்கள் இணைந்து ஒரு லட்சம் மரக்கன்றுகளை நடவு செய்வதை இலக்காகக் கொண்டுள்ளன. அந்த இலக்கை நோக்கிய முதல் அடியாக இத்திட்டத்தின் தொடக்க நிகழ்வு அமைந்துள்ளது.
கோயம்புத்தூர் மாவட்ட ஆட்சியர் பவன்குமார் ஜி. கிரியப்பனவர்,இந்நிகழ்வில் சிறப்பு விருந்தினராகக் கலந்து கொண்டு திட்டத்தைத் தொடங்கி வைத்தார். இந்து சமய அறநிலையத்துறையின் இணை ஆணையர் பெ.ரமேஷ், ரோட்டரி மாவட்டம் 3206-ன் மாவட்ட ஆளுநர் ரோட்டேரியன் ஆர். எஸ். மாருதி, சிறுதுளி அமைப்பின் நிர்வாக அறங்காவலர் வனிதா மோகன், ரோட்டரி கிளப் ஆஃப் கோயம்புத்தூர் வெஸ்ட் தலைவர் ரோட்டேரியன் வி.சந்திரசேகர், செயலாளர் ரோட்டேரியன் முத்தழகப்பன், சமூக சேவைப் பிரிவுத் தலைவர் ரோட்டேரியன் சி.கே.சசிகுமார்,திட்டத் தலைவர் ரோட்டேரியன் பி. பி. சுப்பிரமணியன், பல்வேறு ரோட்டரி சங்கங்களின் உறுப்பினர்கள் மற்றும் சிறுதுளி அமைப்பின் உயர்மட்டக் குழு உறுப்பினர்கள் மற்றும் பணியாளர்கள் உள்ளிட்டோர் இந்நிகழ்வில் பங்கேற்றனர்.
இந்நிகழ்வின் ஒரு பகுதியாக,வாழ்வாதாரத் தேவைகளுக்காக உதவி தேவைப்படும் ஒரு குடும்பத்தின் அன்றாட வாழ்க்கைக்கு ஆதரவளிக்கும் வகையில், கோயம்புத்தூர் மாவட்ட ஆட்சியர் பவன்குமார் ஜி. கிரியப்பனவர்,அக்குடும்பத்திற்குத் தேவையான அத்தியாவசியப் பொருட்களை வழங்கினார்.சுற்றுச்சூழல் பாதுகாப்புப் பணிகளுடன் சமூக நலனையும் இணைத்து முன்னெடுக்கும் முயற்சியாக இந்நிகழ்வு அமைந்தது.
‘ரோட்டரி யுனைட் வனம்’ திட்டம், கோயம்புத்தூரில் உள்ள அனைத்து ரோட்டரி சங்கங்களும் ஒருங்கிணைந்து செயல்படுவதன் மூலம், மரம் நடுதல் மற்றும் பசுமைப் பரப்பை அதிகரித்தல் ஆகிய இலக்குகளை நோக்கி முன்னேறும் ஒரு கூட்டு முயற்சியாகும். ஒரு லட்சம் மரக்கன்றுகளை நடவு செய்யும் இலக்கை நோக்கிய இம்முயற்சி, நகரின் சுற்றுச்சூழல் தரத்தை மேம்படுத்தவும், காற்று மாசுபாட்டைக் குறைக்க உதவவும், எதிர்காலத் தலைமுறைகளுக்குப் பசுமையான சூழலை உருவாக்கவும் வழிவகுக்கும்.
அரசுத் துறைகள், ரோட்டரி சங்கங்கள், உள்ளாட்சி அமைப்புகள் மற்றும் சுற்றுச்சூழல் ஆர்வலர்கள் இணைந்து மேற்கொள்ளும் இத்தகைய முயற்சிகள், கோயம்புத்தூர் மட்டுமின்றி தமிழகத்தின் பசுமை வளர்ச்சிக்கும் நிலையான சுற்றுச்சூழல் பாதுகாப்பிற்கும் வலுசேர்க்கும்.
For English News
