April 17, 2026 
தண்டோரா குழு
தமிழ்நாட்டில் தனது செயல்பாடுகளை தீவிரப்படுத்தும் வகையில், கோத்ரேஜ் கேபிட்டல் நிறுவனம், தனது துணை நிறுவனம் கோத்ரேஜ் ஹவுசிங் ஃபைனான்ஸ் மூலம் மலிவு விலை வீட்டுவசதி நிதி திட்டத்தை கோயம்புத்தூரில் அறிமுகப்படுத்தியுள்ளது.
இந்த முயற்சி, மாநிலத்தில் வீட்டுவசதி கடன்களை எளிதாகக் கிடைக்கச் செய்வதற்கான முக்கிய முன்னேற்றமாக பார்க்கப்படுகிறது. மகாராஷ்டிரா, குஜராத் மற்றும் ராஜஸ்தான் மாநிலங்களில் வெற்றிகரமாக செயல்பட்ட பிறகு, தமிழ்நாடு இந்த திட்டத்தின் நான்காவது முக்கிய சந்தையாக இணைந்துள்ளது.
கோயம்புத்தூரை மையமாகக் கொண்டு இந்த விரிவாக்கம் மேற்கொள்ளப்பட்டுள்ளது.
தொழில் மற்றும் தகவல் தொழில்நுட்ப வளர்ச்சியால் வேகமாக முன்னேறும் கோயம்புத்தூரில்,குறைந்த மற்றும் நடுத்தர வருமானம் கொண்ட மக்களிடையே வீடு வாங்கும் ஆர்வம் அதிகரித்து வருகிறது. குறிப்பாக முதன்முறையாக வீடு வாங்குபவர்கள், சம்பளதாரர்கள், சிறு மற்றும் நடுத்தர தொழில் முனைவோர் மற்றும் சுயதொழில் செய்பவர்கள் இந்த திட்டத்தின் முக்கிய பயனாளர்களாக இருப்பார்கள்.
இந்த வீட்டுக் கடன் திட்டத்தின் மூலம், நெகிழ்வான மாத தவணை (EMI), 25 ஆண்டுகள் வரை கடன் காலம், மற்றும் வருமானத்திற்கு ஏற்ப தனிப்பயன் மதிப்பீடு போன்ற வசதிகள் வழங்கப்படுகின்றன. மேலும், தொழில்நுட்ப ஆதரவு மூலம் விரைவான கடன் அனுமதி வழங்கப்படுவதால், வாடிக்கையாளர்களுக்கு எளிதான அனுபவம் கிடைக்கும்.
பெண்கள் வீடு வாங்குவதற்கு ஊக்கமளிக்கும் வகையில் “ஆரோஹி” என்ற சிறப்பு முயற்சியும் அறிமுகப்படுத்தப்பட்டுள்ளது.
கோத்ரேஜ் ஹவுசிங் ஃபைனான்ஸ் நிறுவனத்தின் நிர்வாக இயக்குனர் மற்றும் தலைமை செயல் அதிகாரி மெஹர்னோஷ் டாடா கூறுகையில்,
“கோயம்புத்தூரில் வீட்டு வசதிக்கான தேவை தொடர்ந்து அதிகரித்து வருகிறது. குறிப்பாக சுயதொழில் செய்பவர்களுக்கு ஏற்ற வகையில் நெகிழ்வான கடன் தீர்வுகளை வழங்குவது எங்கள் முன்னுரிமையாகும்” என்றார்.
மேலும், கோயம்புத்தூரைத் தொடர்ந்து மதுரை, நாகர்கோவில், திருநெல்வேலி, திருச்சி, சென்னை, சேலம் உள்ளிட்ட நகரங்களிலும் சேவைகள் விரிவுபடுத்தப்படவுள்ளன. தமிழ்நாடு முழுவதும் 15 கிளைகள் கொண்ட வலையமைப்பை உருவாக்கும் இலக்கையும் நிறுவனம் நிர்ணயித்துள்ளது.
₹25 லட்சம் முதல் ₹50 லட்சம் வரையிலான வீடுகளுக்கான தேவை கோயம்புத்தூரில் அதிகரித்து வருவதால், அந்த விலைப் பிரிவில் கடன் வழங்கல் அதிக கவனம் பெறும் என நிறுவனம் தெரிவித்துள்ளது.
தொடர்ந்து தொழில், கல்வி, சுகாதாரம் மற்றும் ஐடி துறைகளின் வளர்ச்சியால், அடுத்த பத்து ஆண்டுகளில் கோயம்புத்தூர் தென்னிந்தியாவின் முக்கிய மலிவு வீட்டு மையமாக உருவெடுக்கும் என எதிர்பார்க்கப்படுகிறது. குறிப்பாக சரவணம்பட்டி, சூலூர், கிணத்துக்கடவு, பொள்ளாச்சி சாலை போன்ற புறநகர் பகுதிகளில் வீட்டு தேவைகள் அதிகரிக்கும் நிலை உருவாகியுள்ளது.
For English News
