July 6, 2026 
தண்டோரா குழு
கோவை மாவட்ட நீதிமன்றங்களில் புதிய அரசு வழக்கறிஞர்களுக்கான நியமன உத்தரவுகள் இன்னும் வழங்கப்படாததால் வழக்கு விசாரணைகள் கடுமையாக பாதிக்கப்பட்டுள்ளன.
இந்த நிலையில், இன்று விசாரணைக்கு பட்டியலிடப்பட்ட எட்டு வழக்குகளில் அரசு தரப்பு வழக்கறிஞர்கள் ஆஜராகாததால், கோவை 5-வது கூடுதல் மாவட்ட நீதிமன்றம் மாவட்ட ஆட்சியர் சார்பில் மாநில அரசுக்கு மொத்தம் ரூ.62 ஆயிரம் வழக்கு செலவு மற்றும் இழப்பீடு வழங்க உத்தரவிட்டது.
கோவை மாவட்ட நீதிமன்றங்களில் பணியாற்றிய அரசு வழக்கறிஞர்களின் பதவிக்காலம் கடந்த ஜூன் 30-ஆம் தேதியுடன் நிறைவடைந்தது. புதியதாக 24 அரசு வழக்கறிஞர்கள் நியமிக்கப்பட்டிருந்தாலும், அதற்கான அதிகாரப்பூர்வ உத்தரவுகள் வழங்கப்படாததால் அவர்கள் இன்னும் பொறுப்பேற்க முடியாத சூழல் ஏற்பட்டுள்ளது.
இதன் காரணமாக பல வழக்குகளின் விசாரணைகள் தாமதமடைந்து வருகின்றன.
இன்று 5-வது கூடுதல் மாவட்ட நீதிமன்றத்தில் விசாரணைக்கு வந்த கருமத்தம்பட்டி கொலை வழக்கில், குற்றம்சாட்டப்பட்டவர் ஆஜர்படுத்தப்பட்டிருந்தார்.அரசு தரப்பு சாட்சியளிக்க கேரளாவில் இருந்து மருத்துவர் ஒருவர் நீதிமன்றத்திற்கு வந்திருந்த நிலையில்,கூடுதல் அரசு வழக்கறிஞர் ஆஜராகாததால் சாட்சியிடம் விசாரணை நடத்த முடியவில்லை.
இதையடுத்து அரசு தரப்பின் அலட்சியத்தால் வழக்கை ஒத்திவைக்க வேண்டிய நிலை ஏற்பட்டதாகக் குறிப்பிட்ட நீதிபதி சிவக்குமார்,மாவட்ட ஆட்சியர் சார்பில் ரூ.10 ஆயிரத்தை ஒரு வாரத்திற்குள் நீதிமன்றத்தில் செலுத்தவும், அந்தத் தொகையை மருத்துவரின் பயணச் செலவாக வழங்கவும் உத்தரவிட்டார்.
இதேபோல்,பந்தயசாலை காவல் நிலையத்தில் பதிவு செய்யப்பட்ட மற்றொரு வழக்கில், திருவாரூரில் இருந்து உதவி ஆய்வாளர் ஒருவர் சாட்சியளிக்க வந்திருந்தார். குற்றம்சாட்டப்பட்ட ஐந்து பேரும் நீதிமன்றத்தில் ஆஜராகியிருந்த நிலையில்,அரசு வழக்கறிஞர் இல்லாததால் விசாரணை நடைபெறவில்லை.
இதனால் தேவையின்றி நீதிமன்றத்திற்கு வரவழைக்கப்பட்ட குற்றம்சாட்டப்பட்ட ஐந்து பேருக்கும் தலா ரூ.1,000 வீதமும், உதவி ஆய்வாளருக்கு ரூ.4,000-மும் இழப்பீடாக வழங்க மாநில அரசு ரூ.9,000-ஐ ஒரு வாரத்திற்குள் செலுத்த வேண்டும் என நீதிபதி உத்தரவிட்டார்.இவ்வாறு இன்று விசாரணைக்கு வந்த மொத்தம் எட்டு வழக்குகளில் அரசு தரப்பு வழக்கறிஞர்கள் ஆஜராகாததன் காரணமாக, கோவை மாவட்ட ஆட்சியர் சார்பில் மாநில அரசுக்கு மொத்தம் ரூ.62 ஆயிரம் அபராதம் மற்றும் வழக்கு செலவுத் தொகை விதித்து 5-வது கூடுதல் மாவட்ட நீதிமன்ற நீதிபதி சிவக்குமார் உத்தரவிட்டார்.
மாவட்டம் முழுவதும் அரசு வழக்கறிஞர்கள் மற்றும் கூடுதல் அரசு வழக்கறிஞர்கள் நியமனத்தில் ஏற்பட்டுள்ள தாமதம், நீதிமன்ற நடவடிக்கைகள் மற்றும் வழக்கு விசாரணைகளில் பெரும் பாதிப்பை ஏற்படுத்தி வருவது குறிப்பிடத்தக்கது.
For English News
