November 28, 2016 
தண்டோரா குழு
ரூபாய் 500 மற்றும் 1000 நோட்டுகளை முன்கூட்டியே அச்சடித்திருந்தால் கறுப்புப் பணம் வைத்திருப்பவர்களுக்குத் தகவல் தெரிந்திருக்கும்.அதனால் தான்,அமைச்சரவைக்குக் கூட பிரதமர் தெரிவிக்கவில்லை என்று மதிமுக பொதுச் செயலாளர் வைகோ குறிப்பிட்டார்.
இது குறித்து வைகோ , சென்னை விமான நிலையத்தில் திங்கட்கிழமை செய்தியாளர்களிடம் பேசியதாவது:
ரூபாய் 500 மற்றும் 1000 நோட்டுகள் செல்லாது என்று பிரதமர் மோடி கடந்த நவம்பர் 8ம் தேதி இரவு அறிவித்தபோது தமிழகத்திலேயே முதல் ஆளாக நான்தான் அவரது நடவடிக்கையை வரவேற்றேன்.
அதன் பிறகே மற்ற தலைவர்கள் மோடியின் அறிவிப்பை வரவேற்று அறிக்கை வெளியிட்டார்கள். ஆனால், ஆதரவு தெரிவித்து அறிக்கை விட்டவர்கள் தற்போது எதிர்க்கிறார்கள்.
பிரதமர் மோடியின் அதிரடி நடவடிக்கையால் பொதுமக்களும், வியாபாரிகளும் சிரமத்திற்கு ஆளாகியுள்ளது உண்மையே.ரூபாய் 500, 1000 நோட்டுகளை முன்கூட்டியே அச்சடித்திருந்தால், அது குறித்த தகவல் கறுப்பு பணம் வைத்திருப்பவர்களுக்கு எப்படியாவது தெரிந்திருக்கும். அதனால் தான் அமைச்சரவைக்குக் கூட தெரிவிக்கப்படவில்லை.
இந்த அறிவிப்பை எதிர்த்து பல்வேறு அரசியல் கட்சினர், அமைப்பினர் போராட்டம் நடத்தி வருகின்றனர். அது அவர்களின் உரிமை. பிற கட்சிகளை விமர்சிக்க விரும்பவில்லை.ஆனால், பொருளாதார மாணவன் என்பதால் இந்தியாவுக்கு மோடியின் திட்டம் தேவை என்று வரவேற்றேன்.
For English News
