February 28, 2017 
தண்டோரா குழு
கோவை மாவட்டத்தில் உள்ள இ-சேவை மையங்களில் வண்ணப் புகைப்படத்துடன் கூடிய வாக்காளர் அடையாள அட்டை, பிளாஸ்டிக் ஆதார் கார்டு போன்றவற்றைப் பொதுமக்கள் பெற்று, பயனடையலாம் என்று கோவை மாவட்ட ஆட்சியர் ஹரிஹரன் தெரிவித்துள்ளார்.
இது குறித்து அவர் செவ்வாய்கிழமை வெளியிட்டுள்ள அறிக்கையில் கூறியிருப்பதாவது;
தமிழக மக்கள் சிரமமின்றி எளிதாக சான்றிதழ்களைப் பெற வேண்டும் என்ற நோக்கத்தில் உருவானதே இந்தப் பொது இ சேவை மையம். 2014-ம் தொடங்கப்பட்ட இத்திட்டம் பொதுமக்களின் பெரும் வரவேற்பைப் பெற்றுள்ளது. அதைத் தொடர்ந்து அனைத்து வட்டாட்சியர் மற்றும் வட்டார வளர்ச்சி அலுவலகங்கள், தொடக்க வேளாண்மை கூட்டுறவு சங்க அலுவலகங்கள் உள்ளிட்ட பல பகுதிகளில் இ சேவை மையங்கள் செயல்பட்டு வருகின்றன.
கோவை மாவட்டத்தில் செயல்படும் 231 இ-சேவை மையங்களில் 1,38,995 சாதிச் சான்றிதழ்கள் , 1,82,037 வருமான சான்றிதழ்கள், 6,67,93 இருப்பிடச் சான்றிதழ்கள் , 10,405 முதல் பட்டதாரி சான்றிதழ்கள், 61 கணவனால் கைவிடப்பட்டோருக்கான சான்றிதழ்கள் மற்றும் 33,239 பட்டா மாறுதல்கள் வழங்கப்பட்டுள்ளன.
திருமண உதவித் தொகைக்கு விண்ணப்பித்தல், 2 பெண் குழந்தைகள் திட்டத்தின் கீழ் விண்ணப்பித்தல், மின் கட்டணம், பிளாஸ்டிக் ஆதார் அட்டை எடுத்தல் போன்ற பல்வேறு வகையிலான பணிகள் இ-சேவை மையங்களில் மேற்கொள்ளப்பட்டு வருகின்றன.
தற்போது வண்ணப் புகைப்படத்துடன் கூடிய வாக்காளர் அடையாள அட்டைகளும் ரூ.50 கட்டணத்தில் வழங்கப்பட்டு வருகின்றன. இதன் மூலம் ஏற்கனவே வாக்காளர் அடையாள அட்டை உள்ள பொதுமக்கள் தங்கள் வாக்காளர் அடையாள அட்டை எண்ணைத் தெரிவித்து வண்ணப் புகைப்படத்துடன் கூடிய வாக்காளர் அடையாள அட்டையைப் புதிதாகப் பெற்றுக் கொள்ளலாம்.அதே போல் ஏற்கெனவே ஆதார் எண் உள்ளவர்கள் புதிய பிளாஸ்டிக் ஆதார் அட்டைகளைப் பெற்றுக்கொள்ளலாம்.
இவ்வாறு மாவட்ட ஆட்சியர் ஹரிஹரன் தெரிவித்துள்ளார்.
இது குறித்து மின்னணு இ-சேவை மையத்தின் மூலம் சான்றிதழ் பெற்ற பயனாளி காளிராஜ் கூறுகையில்,
“நான் பெரியநாயக்கன்பாளையம் டேங்க் முதல் வீதியில் வசித்து வருகிறேன். எனக்குக் கண்பார்வை கிடையாது. சான்றிதழ்களைப் பெறுவதற்கு தமிழக அரசு எளிதான திட்டத்தை அறிமுகப்படுத்தியுள்ளது என்பதை ஒருவர் சொல்ல அறிந்தேன்.
அதன்படி, கோயம்புத்தூர் வடக்கு வட்டாட்சியர் அலுவலகத்தில் வருமானச் சான்றிதழ், சாதிச் சான்றிதழ் மற்றும் வண்ணப் புகைப்படத்துடன் கூடிய வாக்காளர் அடையாள அட்டை, பிளாஸ்டிக் ஆதார் அட்டை போன்ற சேவைகள் வழங்கப்படுவதை விசாரித்து அவற்றைப் பெற வேண்டி விண்ணப்பித்தேன்.
மணியக்காரர், ஆர்.ஐ., தாசில்தார் ஆகியோரைத் தேடி அலையாமல் ஒரே இடத்தில் எனது விவரங்களைப் பதிவு செய்து, மிக சுலபமாகச் சான்றிதழைப் பெற்றுக் கொண்டேன். எங்களது சூழ்நிலையைப் புரிந்து கொண்டு தமிழக அரசு இது போன்ற திட்டங்களைச் செயல்படுத்தி வருவது மன நிறைவு தருகிறது” என்றார்.
ஸ்ரீ ராமகிருஷ்ணா பல் மருத்துவக் கல்லூரி மற்றும் மருத்துவமனை சார்பில் பற்கள் குறித்த சிறப்பு கண்காட்சி
கோவை அருகே கஞ்சா சாக்லேட் பறிமுதல் : விற்பனைக்கு வைத்து இருந்த நபர் கைது
பிளஸ் 1 பொதுத்தேர்வு தேர்ச்சி முடிவுகள் வெளியீடு – கோவை மாவட்டம் முதலிடம்.
கிருஷ்ணா டிராபி 2024 – மாநில அளவிலான பொறியியல் கல்லூரிகள் ஆசிரியர்களுக்கு இடையேயான கிரிக்கெட் போட்டி
கோவையில் பொதுமக்களை ஈர்த்த பஞ்சாபி உணவு திருவிழா – ஆடல், பாடல், ஃபேசன் சோ நிகழ்சிகளால் கவரப்பட்ட பொதுமக்கள்
கீரைக்கடை.காம் நிறுவனத்தின் புதிய தயாரிப்பான ‘ஹெர்பல் டீ ட்விஸ்ட்’ அறிமுகம்
For English News
