October 30, 2026 
தண்டோரா குழு
உலக பக்கவாத தினத்தை முன்னிட்டு, பொதுமக்களிடையே பக்கவாதம் குறித்த விழிப்புணர்வை ஏற்படுத்தும் நோக்கில், கோயம்புத்தூர் கேஎம்சிஎச் மருத்துவமனை சார்பில் மருத்துவமனை வளாகத்தில் நீல நிற விளக்குகள் ஒளிரச் செய்யப்பட்டன.
பக்கவாதம் (Stroke) என்பது மூளைக்குச் செல்லும் ரத்த ஓட்டம் தடைபடுவதாலோ அல்லது மூளையில் ரத்தக் கசிவு ஏற்படுவதாலோ உண்டாகும் தீவிர மருத்துவ அவசரநிலையாகும்.பக்கவாதம் ஏற்பட்டவர்களுக்கு உடனடியாக மருத்துவ சிகிச்சை அளிப்பது உயிரைக் காப்பதற்கும், நிரந்தர உடல் பாதிப்புகளைக் குறைப்பதற்கும் மிகவும் அவசியமாகும்.
முகத்தின் ஒரு பக்கம் கோணலாகுதல், கை அல்லது காலில் திடீரென பலவீனம் ஏற்படுதல், பேச்சுத் தடுமாற்றம், திடீர் பார்வைக் குறைபாடு அல்லது சமநிலை இழப்பு போன்றவை பக்கவாதத்தின் முக்கிய அறிகுறிகளாகும். இத்தகைய அறிகுறிகள் தென்பட்டால், காலம் தாழ்த்தாமல் உடனடியாக மருத்துவ உதவியை நாட வேண்டும். அறிகுறிகள் சிறிது நேரத்தில் மறைந்தாலும் மருத்துவப் பரிசோதனை அவசியம்.
“பக்கவாத சிகிச்சையில் ஒவ்வொரு நிமிடமும் முக்கியம்” என்ற விழிப்புணர்வுச் செய்தியை வலியுறுத்தும் வகையில் இந்த நீல நிற விளக்குகள் ஒளிரும் நிகழ்வு அமைந்தது.
உயர் ரத்த அழுத்தம், சர்க்கரை நோய், அதிக கொழுப்பு, புகைப்பழக்கம் போன்ற பக்கவாதத்திற்கான ஆபத்துக் காரணிகளைக் கட்டுப்படுத்துவதன் மூலமும், ஆரோக்கியமான வாழ்க்கை முறையைப் பின்பற்றுவதன் மூலமும் பக்கவாதம் ஏற்படும் அபாயத்தைக் குறைக்க முடியும்.
பக்கவாதத்தின் அறிகுறிகளை பொதுமக்கள் முன்கூட்டியே அறிந்துகொண்டு, அவசர நேரத்தில் உடனடியாக மருத்துவ சிகிச்சை பெறுவதன் முக்கியத்துவத்தை எடுத்துரைப்பதே இந்நிகழ்வின் முக்கிய நோக்கமாகும்.
கேஎம்சிஎச் மருத்துவமனை, கோயம்புத்தூர்
பக்கவாதத்தை அறிந்துகொள்வோம்! அறிகுறிகளை அடையாளம் காண்போம்! உயிரைக் காப்போம்!
For English News
