October 8, 2026 
தண்டோரா குழு
குமரகுரு வளாகத்தில் 22,065 சதுர அடி பரப்பளவில் மூன்று ஐடிஎஃப் தரநிலை டென்னிஸ் மைதானங்களுடன் அமைக்கப்பட்டுள்ள குமரகுரு டென்னிஸ் அகாடமி மற்றும் மிட்ஃபீல்ட் விளையாட்டு வசதி புதன்கிழமை திறந்து வைக்கப்பட்டது.
டென்னிஸ் விளையாட்டில் முறையான பயிற்சி, தொடர் பயிற்சி மற்றும் போட்டிகளில் பங்கேற்பதற்கான வாய்ப்புகளை உருவாக்கும் வகையில் இந்த விளையாட்டு வசதி அமைக்கப்பட்டுள்ளது.
புதிய வசதியில் செயற்கை அக்ரிலிக் தரைத்தளம், பிரத்யேக மைதான விளக்குகள் மற்றும் 12 அடி உயர வேலி அமைக்கப்பட்டுள்ளன.ஒவ்வொரு டென்னிஸ் மைதானமும் 49 × 82 அடி அளவில் உள்ளது. மேலும், பயிற்சிச் சுவர் மற்றும் வாகன நிறுத்துமிட வசதிகளும் ஏற்படுத்தப்பட்டுள்ளன.
குமரகுரு டென்னிஸ் அகாடமி, குமரகுரு மாணவர்கள் மட்டுமின்றி பொதுமக்களுக்கும் முறையான டென்னிஸ் பயிற்சி மற்றும் தொடர் பயிற்சி வாய்ப்புகளை வழங்கும் வகையில் உருவாக்கப்பட்டுள்ளது. அடிப்படை திறன்களை வளர்த்துக்கொள்வது முதல் போட்டித் தரத்திலான டென்னிஸ் பயிற்சி பெறுவது வரை வெவ்வேறு நிலைகளில் உள்ள வீரர்களுக்கு ஏற்ப பயிற்சி வழங்கப்பட உள்ளது. திங்கள், புதன் மற்றும் வெள்ளிக்கிழமைகளில் மாலை 5 மணி முதல் 8 மணி வரை பயிற்சி அமர்வுகள் நடைபெற உள்ளன.
அகாடமியின் முக்கிய அம்சங்களில் ஒன்றாக டென்னிஸ் ஆதரவு திட்டம் (Tennis Support Programme) அமைந்துள்ளது. இதன் மூலம் திறமையுள்ள மாணவர் விளையாட்டு வீரர்களுக்கு பயிற்சி உதவித்தொகை வழங்கப்பட உள்ளது. இதன் வாயிலாக திறமையான இளம் வீரர்கள் முறையான பயிற்சியையும் தேவையான ஆதரவையும் பெற்று போட்டி டென்னிஸ் துறையில் தங்களது திறனை மேம்படுத்திக் கொள்ளும் வாய்ப்பைப் பெறுவர்.
அகாடமி தொடக்கத்தையொட்டி ஆண்கள் மற்றும் பெண்களுக்கான Open Category Tennis Tournament 2026 போட்டியும் நடைபெற்றது. அக்டோபர் 7 முதல் 9-ஆம் தேதி வரை நடைபெறும் இப்போட்டி, போட்டித் திறன் கொண்ட வீரர்கள் பங்கேற்று விளையாடும் தளமாக அமைந்ததுடன், விளையாட்டு ஒழுக்கம் மற்றும் விளையாட்டு உணர்வையும் வலியுறுத்தும் வகையில் ஏற்பாடு செய்யப்பட்டுள்ளது. தேசிய அளவிலான போட்டிகளில் பங்கேற்ற டென்னிஸ் வீரர்களை உருவாக்கிய பாரம்பரியம் குமரகுருவுக்கு உள்ளது.
அந்த தொடர்ச்சியில்,புதிய டென்னிஸ் அகாடமி, மாணவர்கள் மற்றும் இளம் வீரர்கள் தொடர்ந்து பயிற்சி பெறவும், போட்டிகளில் பங்கேற்கவும், தங்களது விளையாட்டுத் திறனை படிப்படியாக வளர்த்துக்கொள்ளவும் ஒரு நிரந்தர வசதியை உருவாக்குகிறது.
விளையாட்டு வசதி மையத்தை, சென்னை இந்திய தொழில்நுட்பக் கழகத்தின் (IIT Madras) Dean – Alumni and Corporate Relations மற்றும் பேராசிரியர் டாக்டர் அஷ்வின் மகாலிங்கம் திறந்து வைத்தார். குமரகுரு நிறுவனங்களின் தலைவர் சங்கர் வனவராயர் நிகழ்ச்சிக்கு தலைமை வகித்தார். கோவை மாவட்ட டென்னிஸ் சங்கத்தின் பொருளாளர் நரேந்திர குமார் சிறப்பு செய்தார்.
டாக்டர் அஷ்வின் மகாலிங்கம் 2006-ஆம் ஆண்டு ஐஐடி மெட்ராஸில் ஆசிரியராக இணைந்தார். ஐஐடி மெட்ராஸில் சிவில் இன்ஜினியரிங் பிரிவில் பி.டெக் பட்டமும், அமெரிக்காவின் ஸ்டான்ஃபோர்ட் பல்கலைக்கழகத்தில் Construction Engineering and Management துறையில் முதுகலை மற்றும் முனைவர் பட்டமும் பெற்றுள்ளார். நிலையான வளர்ச்சி, உட்கட்டமைப்பு திட்டமிடல் மற்றும் மேலாண்மை, பொது–தனியார் கூட்டாண்மை உள்ளிட்ட துறைகளில் அவரது கல்வி மற்றும் ஆய்வுப் பணி அமைந்துள்ளது. பெரிய பொறியியல் திட்டங்களில் தொழில்நுட்பத்தை அறிமுகப்படுத்துதல் மற்றும் அதன் மேலாண்மை தொடர்பான ஆய்வுகளிலும் அவர் ஈடுபட்டு வருகிறார்.
அவர் தற்போது ஐஐடி மெட்ராஸின் Alumni and Corporate Relations துறையின் டீனாக பணியாற்றி வருவதுடன், முன்னதாக அந்நிறுவனத்தின் School of Sustainability தலைவராகவும் பணியாற்றியுள்ளார்.
புதிய டென்னிஸ் அகாடமி மூலம் குமரகுரு வளாகத்தில் தரமான விளையாட்டு உள்கட்டமைப்பு, முறையான பயிற்சி மற்றும் திறமையான மாணவர் வீரர்களுக்கான ஆதரவு ஆகியவை ஒருங்கிணைக்கப்பட்டுள்ளன. இதன் மூலம் அடிப்படை பயிற்சியில் இருந்து போட்டி நிலை வரை முன்னேற விரும்பும் வீரர்களுக்கு தொடர்ச்சியான பயிற்சி மற்றும் வாய்ப்புகள் கிடைக்கும் என எதிர்பார்க்கப்படுகிறது. குமரகுருவின் விளையாட்டு சூழலையும் மாணவர்களின் கல்வி சார்ந்த வளர்ச்சியுடன் இணைந்து விளையாட்டுத் திறன்களை வளர்ப்பதற்கான வாய்ப்புகளையும் புதிய வசதி மேலும் விரிவுபடுத்தியுள்ளது.
For English News
