May 26, 2017 
தண்டோரா குழு
அமெரிக்காவில் தந்தையும் மகனும் ஒன்றாக டிப்ளமோ பட்டம் பெற்றுள்ள சம்பவம் பலருக்கு ஆச்சரியத்தை அளித்துள்ளது.
அமெரிக்கா நியூஜெர்சி மாகாணத்தில் டுவின்சொன் ஜீன்டி(63) என்பவர் கடந்த 25 ஆண்டுகளாக வசித்து வருகிறார். அவர் நியூஜெர்சி போக்குவரத்து பஸ் ஓட்டுநராக பணியாற்றி, கடந்த 2௦13-ம் ஆண்டு, ஓய்வுபெற்றார். பணி ஓய்வுக்கு பிறகு, அவர் வில்லியம் பாட்டர்சன் பல்கலைக்கழகத்தில் முழு நேர மாணவராக சேர்ந்தார்.
அதேபோல், டுவின்சொன்னுடைய மகன் பெஞ்சமின் கடந்த 2008-ம் ஆண்டு, ரட்ஜெர்ஸ் பலகலைக்கழகத்தில் உளவியல் பாடத்தில் சேர்ந்தார். ஆனால், படிப்பை பாதியிலேயே விட்டுவிட்டு பாஸ்ட்புட் நிறுவனம் ஒன்றில் பணியாற்றி வந்தார்.
கல்லூரி படிப்பை முடிக்க வேண்டும் என்று அவருடைய தந்தை காட்டிய ஆர்வம், பெஞ்சமினிக்கு உத்வேகத்தை அளித்துள்ளது. அதனால் மீண்டும் படிக்க வேண்டும் என்று முடிவு செய்த பெஞ்சமின், தான் சேர்ந்த ரட்ஜெர்ஸ் பலகலைக்கழகத்துக்கு திரும்பாமல், அவருடைய தந்தை படித்து வந்த வில்லியம் பாட்டர்சன் பல்கலைக்கழகத்தில் சேர்ந்து உளவியல் பாடத்தை படித்தார்.கடந்த வெள்ளிக்கிழமை நடந்த பட்டமளிப்பு விழாவில் தந்தையும் மகனும் ஒன்றாக பட்டம் பெற்றனர்.
“என் தந்தை தான் என்னுடைய மிக பெரிய உத்வேகம். பணியிலிருந்தோ அல்லது வகுப்பிலிருந்தோ நான் தாமதமாக வீட்டிற்கு வரும்போது, அவர் படித்துக்கொண்டிருப்பதை பார்த்திருக்கிறேன்.
அவருடைய கடின உழைப்பு என்னை உற்சாகப்படுத்தும். படமளிப்பு விழாவின்போது, அவர் மேடைக்கு சென்று பட்டத்தை பெற்றபோது, விவரிக்க முடியாத மகிழ்ச்சி அடைந்தேன்” என்று பெஞ்சமின் கூறினார்.
For English News
