October 8, 2026 
தண்டோரா குழு
ICEGATE 2.0 தளம் மூலம் சுங்க வரி, மத்திய கலால் வரி மற்றும் சேவை வரி ஆகியவற்றை செலுத்தும் வசதியை டிபிஎஸ் பேங்க் இந்தியா அறிமுகப்படுத்தியுள்ளது.
இந்த புதிய வசதியின் மூலம், வங்கி இப்போது ஜிஎஸ்டி, நேரடி வரி மற்றும் சுங்கம் தொடர்பான வரி செலுத்துதல்களை ஆதரிக்கிறது. இதன் மூலம் அரசு தளங்கள் வழியாக மூன்று முக்கிய மத்திய வரிப் பிரிவுகளையும் வழங்கும் இந்தியாவின் ஒரே முழு உரிமை பெற்ற துணை நிறுவனமாக டிபிஎஸ் பேங்க் இந்தியா உள்ளது.வர்த்தகம் மற்றும் தொழில்துறை அமைச்சகத்தின் தரவுகளின்படி, இந்தியாவின் வர்த்தக இறக்குமதி 2026-27 நிதியாண்டின் ஏப்ரல் முதல் ஆகஸ்ட் வரை 363 பில்லியன் அமெரிக்க டாலர்களை எட்டியுள்ளது.
இது கடந்த ஆண்டை விட 18.2 சதவீதம் அதிகமாகும். அதே நேரத்தில் ஏற்றுமதி 215.9 பில்லியன் அமெரிக்க டாலர்களாக அதிகரித்துள்ளது. வர்த்தக நடவடிக்கைகள் அதிகரிக்கும் அதே வேளையில் வணிகங்களும் தங்களின் செயல்பாடுகளை அதிகளவில் டிஜிட்டல் மயமாக மாற்றி வருகின்றன. இதனால் தொழில்முனைவோர் தங்களின் வங்கி மற்றும் நிதித் தேவைகளுடன் சட்டப்பூர்வ வரிகடமைகளையும் எளிதாக நிர்வகிப்பதற்கான வழிகளைத் தேடுகின்றனர். ICEGATE 2.0 உடனான இணைப்பின் மூலம், வாடிக்கையாளர்கள் சுங்க வரி, மத்திய கலால் வரி மற்றும் சேவை வரியை ‘DBS IDEAL’ தளம் வழியாகச் செலுத்த டிபிஎஸ் பேங்க் இந்தியா வழிவகை செய்கிறது.
இது வணிகங்கள் தங்கள் அன்றாட வங்கி மற்றும் நிதித் தேவைகளுக்காகப் பயன்படுத்தும் அதே தளம் மூலமாகவே வர்த்தகம் தொடர்பான முக்கியமான கடமைகளையும் நிர்வகிக்க உதவுகிறது. ICEGATE என்பது இந்திய சுங்கத்துறையின் தேசிய வர்த்தக போர்ட்டல் ஆகும். இது வர்த்தக சமூகத்திற்கும் இந்திய சுங்கத்துறைக்கும் இடையிலான டிஜிட்டல் இணைப்பாக செயல்படுகிறது. இதன் சுங்க இ-பேமெண்ட் தளம் 2.0 மூலம், வாடிக்கையாளர்கள் தங்களுக்கு விருப்பமான வங்கியாக டிபிஎஸ் வங்கியைத் தேர்ந்தெடுத்து, DBS IDEAL மூலம் தங்கள் கட்டணங்களை தடையின்றி செய்து முடிக்கலாம்.
டிபிஎஸ் பேங்க் இந்தியாவின் குளோபல் டிரான்சாக்ஷன் சர்வீசஸ், கார்ப்பரேட் பேங்கிங் பிரிவின் நிர்வாக இயக்குனரும், இந்தியாவிற்கான தலைவருமான திவ்யேஷ் தலால் இது குறித்து கூறுகையில்,
“வணிகங்கள் வளரும்போதும், வர்த்தக நடவடிக்கைகள் ஒன்றுடன் ஒன்று இணையும்போதும், கார்ப்பரேட் நிறுவனங்கள் பல்வேறு வகையான பேமெண்ட் கடமைகளை நிர்வகிக்க எளிமையான மற்றும் திறமையான வழிகளைத் தேடுகின்றன. சுங்க வரி, மத்திய கலால் வரி மற்றும் சேவை வரி செலுத்தும் வசதி அறிமுகம் செய்யப்பட்டுள்ளது எங்களின் சட்டப்பூர்வ கட்டண சேவைகளை மேலும் வலுப்படுத்தியுள்ளது.
இதில் இப்போது நேரடி வரிகள், டிடிஎஸ் மற்றும் ஜிஎஸ்டி ஆகியவை அடங்கும். வாடிக்கையாளர்கள் இப்போது மேம்பட்ட கட்டுப்பாடு, தெளிவு மற்றும் செயல்பாட்டுத் திறனை வழங்கும் ஒரு ஒருங்கிணைந்த தளத்தின் மூலம் தங்கள் கட்டணங்களை நிர்வகிக்கலாம். எங்கள் வாடிக்கையாளர்கள் தங்கள் வணிக வளர்ச்சியில் மட்டும் கவனம் செலுத்தும் வகையில், அவர்களின் வணிகச் செயல்முறைகளில் உள்ள தடைகளை அகற்றுவதற்கான எங்கள் அர்ப்பணிப்பையே இந்த அறிமுகம் காட்டுகிறது” என்றார்.
இந்தச் சேவையானது வார இறுதி நாட்கள் உட்பட தினமும் அதிகாலை 4:00 மணி முதல் இரவு 11:00 மணி வரை கிடைக்கும். வரி செலுத்தும் உரிமையைக் கொண்ட தற்போதைய DBS IDEAL வாடிக்கையாளர்கள் கூடுதல் ஆவணங்கள் ஏதுமின்றி இந்த வசதியைப் பயன்படுத்தலாம். வாடிக்கையாளர்கள் DBS IDEAL தளத்தின் தற்போதைய வசதிகள் மூலம் பணம் செலுத்துவதைத் தொடங்கலாம், அங்கீகரிக்கலாம் மற்றும் கண்காணிக்கலாம்.
மேலும், பேமெண்ட் ரசீதுகளைப் பதிவிறக்கம் செய்து, தங்களின் கட்டணங்கள் குறித்து சிறந்த கட்டுப்பாட்டையும் தெளிவையும் பெறலாம்.
For English News
