June 12, 2026 
தண்டோரா குழு
கோயம்புத்தூரில் செயல்பட்டு வரும் கங்கா நர்சிங் கல்லூரி சார்பில், பியாண்ட் பவுண்டரீஸ்: ரி-இமேஜினிங் மிக்ஸ்டு மெத்தட்ஸ் ரிசர்ச் மெத்தடாலஜி என்ற தலைப்பிலான தேசிய மாநாடு சிறப்பாக நடைபெற்றது. இந்த மாநாட்டில் நாடு முழுவதும் இருந்து செவிலியர்கள், கல்வியாளர்கள், ஆராய்ச்சியாளர்கள், சுகாதார நிபுணர்கள், பேராசிரியர்கள் மற்றும் மாணவர்கள் ஆர்வமுடன் பங்கேற்றனர்.
மிக்ஸ்டு மெத்தட்ஸ் ரிசர்ச் மெத்தடாலஜி உருவாகி வரும் புதிய போக்குகள், புதுமைகள் மற்றும் சவால்கள் குறித்து விவாதிக்க இந்த மாநாடு முக்கிய தளமாக அமைந்தது. குறிப்பாக தரவியல் (Qualitative) மற்றும் அளவியல் (Quantitative) ஆராய்ச்சி அணுகுமுறைகளை ஒருங்கிணைப்பதன் மூலம் சுகாதாரத் துறையில் ஆராய்ச்சியின் தரம், நம்பகத்தன்மை மற்றும் நடைமுறைப் பயன்பாட்டை மேம்படுத்துவது குறித்து பல்வேறு கருத்துகள் பகிரப்பட்டன.
கங்கா மருத்துவமனை மற்றும் கங்கா நர்சிங் கல்லூரியின் நிர்வாக இயக்குநரும், இணை நிறுவருமான கனகவல்லி சண்முகநாதன், கங்கா மருத்துவமனை இயக்குநர்கள் டாக்டர் எஸ்.ராஜசபாபதி, டாக்டர் எஸ். ராஜசேகரன், கங்கா நர்சிங் கல்லூரி அறங்காவலர்கள் நிர்மலா ராஜசபாபதி மற்றும் ரமா ராஜசேகரன் ஆகியோரின் வழிகாட்டுதலின் கீழ் மாநாடு நடைபெற்றது.
மாநாட்டின் தலைமை விருந்தினராக தமிழ்நாடு செவிலியர் மற்றும் தாதியர் குழுமம் பதிவாளர் டாக்டர் ஆர். சங்கர் சண்முகம் கலந்து கொண்டு மாநாட்டைத் தொடங்கி வைத்தார்.
தனது உரையில், சிக்கலான சுகாதாரப் பிரச்சினைகளுக்கு தீர்வு காண கலப்பு ஆராய்ச்சி முறையின் முக்கியத்துவம் அதிகரித்து வருவதாகவும், மருத்துவ நடைமுறைகள் மற்றும் கொள்கை வடிவமைப்புகளுக்கு பயனுள்ள ஆதாரங்களை உருவாக்க ஆராய்ச்சியாளர்கள் புதுமையான அணுகுமுறைகளைப் பின்பற்ற வேண்டும் என்றும் வலியுறுத்தினார்.
மாநாட்டில் ஆராய்ச்சி வடிவமைப்பு, தரவு ஒருங்கிணைப்பு, ஆராய்ச்சியின் துல்லியம், நெறிமுறை சார்ந்த அம்சங்கள் மற்றும் பல்துறை ஒத்துழைப்பு உள்ளிட்ட பல்வேறு தலைப்புகளில் நிபுணர்கள் உரையாற்றினர். அறிவியல் அமர்வுகள் மூலம் பங்கேற்பாளர்கள் தங்களது ஆராய்ச்சி திறன்களை மேம்படுத்திக் கொள்ளும் வாய்ப்பைப் பெற்றதுடன், ஆழமான கல்விசார் விவாதங்களிலும் ஈடுபட்டனர்.
மேலும், இந்த மாநாடு ஆராய்ச்சியாளர்கள் மற்றும் சுகாதாரத் துறை வல்லுநர்கள் இடையே அறிவுப் பகிர்வு, தொழில்முறை வலையமைப்பு மற்றும் ஒத்துழைப்பை மேம்படுத்தும் முக்கிய தளமாக அமைந்தது. கலந்துரையாடல்கள் மற்றும் ஊடாடும் அமர்வுகள் மூலம் பங்கேற்பாளர்கள் பயனுள்ள அனுபவத்தைப் பெற்றனர்.
தேசிய அளவில் நடைபெற்ற இந்த மாநாடு, செவிலியர் கல்வி மற்றும் சுகாதார ஆராய்ச்சி துறைகளில் புதிய சிந்தனைகளையும், தரமான ஆராய்ச்சி நடைமுறைகளையும் ஊக்குவிக்கும் முக்கிய நிகழ்வாக அமைந்தது.
For English News
