July 19, 2022 
தண்டோரா குழு
கோவை மாநகராட்சி மத்திய மண்டலத்திற்குட்பட்ட பகுதிகளில் தூய்மைப்பணிகள் மற்றும் வளர்ச்சிப்பணிகள் குறித்து மாநகராட்சி கமிஷனர் பிரதாப் நேரில் ஆய்வு மேற்கொண்டார்.
கோவை தியாகி குமரன் வீதியில் மாநகராட்சி கமிஷனர் ஆய்வு செய்து குடிநீரில் கழிவு நீர் கலப்பதால் அப்பகுதியில் உள்ள குடிநீர் குழாயினை புதுப்பித்து விரைவாக குடிநீர் விநியோகம் செய்திட சம்மந்தப்பட்ட பொறியாளர்களுக்கு உத்தரவிட்டு அங்குள்ள பொதுமக்களிடம் குடிநீர் விநியோகம் முறையாக உள்ளதா? என கேட்டறிந்தார்.
பின்னர் குப்பைகளை தூய்மைப் பணியாளர்களிடம் வழங்கும்போது அவற்றை மக்கும் குப்பை, மக்காத குப்பை என தரம் பிரித்து வழங்கிட வேண்டும் என பொதுமக்களிடம் அறிவுறுத்தினார்கள்.
அதனைத் தொடர்ந்து பெரியகடை வீதி மாநகராட்சி நடுநிலைப்பள்ளியில் கட்டப்பட்டு வரும் சுற்றுசுவர் பணியை பார்வையிட்டு விரைவாக பணியை முடித்து பயன்பாட்டிற்கு கொண்டுவர பொறியாளர்களுக்கு அறிவுறுத்தினார்.
பின்னர் சலிவன் வீதி பகுதியில் சாலையோரம் கொட்டப்பட்டுள்ள குப்பைகளை உடனடியாக அகற்றிட சுகாதார ஆய்வாளர்களுக்கு மாநகராட்சி கமிஷனர் உத்தரவிட்டார்.பின்னர் ராஜ வீதியில் உள்ள கடைகளில் தடைசெய்யப்பட்ட பிளாஸ்டிக் பொருட்களை பயன்படுத்துகிறர்களா என ஆய்வு செய்து பிளாஸ்டிக் பைகளை பயன்படுத்தாமல் மஞ்சப்பைகளை பயன்படுத்துமாறு அறிவுறுத்தினார்.அதனைத் தொடர்ந்து வீ.வி.எம்.நகரில் உள்ள நகர்ப்புற சுகாதார நிலையத்தில் திடீர் ஆய்வு மேற்கொண்ட அவர் அங்கு மகப்பேறு தாய்மார்களுக்கு வழங்கப்படும் சிகிச்சை முறைகள் குறித்து கேட்டறிந்தார்.
அதனைத் தொடர்ந்து மேட்டுப்பாளையம் சாலையில் உள்ள சங்கனூர் பள்ளம் ரூ.49 கோடி மதிப்பீட்டில் மேம்பாட்டுப்பணிகள், செல்வம்பதி, முத்தண்ணன் குளம் ஏரியில் ஸ்மார்ட் சிட்டி திட்டத்தின் கீழ் ரூ.31.25 கோடி மதிப்பீட்டில் குளத்தின் புனரமைப்புப்பணிகள், வாலாங்குளத்தில் ரூ.67.86 கோடி மதிப்பீட்டில் திட்டப்பணிகள் ஆகிய பணிகள் நடைபெற்றுவருவதை நேரில் பார்வையிட்டு ஆய்வு செய்த அவர் இப்பணிகளை தரமாகவும், துரிதமாகவும் செய்து முடித்து விரைவில் பொதுமக்கள் பயன்பாட்டிற்கு கொண்டுவர சம்பந்தப்பட்ட அலுவலர்களுக்கு உத்தரவிட்டார்.
இந்த ஆய்வுகளின்போது மத்திய மண்டல உதவி கமிஷனர் சங்கர், செயற்பொறியாளர்கள், உதவி நகரமைப்பு அலுவலர் மற்றும் பலர் உடன் இருந்தனர்.
For English News
