May 16, 2018 
தண்டோரா குழு
ம.ஜ.த எம்.எல்.ஏக்கள் கொச்சியில் உள்ள தனியார் விடுதிக்கு அழைத்துச் செல்லப்படுகின்றனர்.
224 சட்டசபைத் தொகுதிகளை கொண்ட கர்நாடகாவில் 222 தொகுதிகளில் வாக்குப்பதிவு 12-ம் தேதி நடைபெற்றது. தேர்தலில் பதிவான வாக்குகள் நேற்று எண்ணப்பட்டன. வாக்கு எண்ணிக்கையில் பா.ஜனதா 104 இடங்களில் வெற்றி பெற்று தனிப்பெரும் கட்சியாக உள்ளது. இதற்கிடையே காங்கிரஸ் 78 இடங்களிலும், மதசார்பற்ற ஜனதா தளம் 38 இடங்களிலும் வெற்றி பெற்று உள்ளது. சுயேட்சை வேட்பாளர்கள் இரண்டு இடங்களில் வெற்றி பெற்றுள்ளனர். 104 தொகுதிகளை வென்று பா.ஜ.க தனிப்பெரும் கட்சியாக உருவெடுத்தாலும் ஆட்சி அமைக்க தேவையான 112 தொகுதிகளில் வெற்றி பெற முடியவில்லை. இதனால் பா.ஜ.க அங்கு தனிப்பெரும்பான்மையுடன் ஆட்சி அமைக்க முடியாத சூழல் ஏற்பட்டுள்ளது.
இதற்கிடையில்,காங்கிரஸ் கட்சியும் மதசார்பற்ற ஜனதா தளமும் கூட்டணி அமைத்துள்ளது. இதனால் கர்நாடகாவில் யார் ஆட்சி அமைப்பார்கள் என்ற குழப்பமான சூழல் நிலவி வருகிறது.
இந்நிலையில், இன்று காலை ம.ஜ.த எம்.எல்.ஏக்கள் கூட்டம் நடைபெற்றது.கூட்டத்தில் 2 எம்.எல்.ஏக்கள் கலந்து கொள்ளவில்லை.இதையடுத்து,ம.ஜ.த எம்.எல்.ஏக்கள் கேரள மாநிலம் கொச்சியில் உள்ள தனியார் விடுதிக்கு அழைத்துச் செல்லப்படுகின்றனர்.
கர்நாடக எம்.எல்.ஏ-க்களுக்கு கேரளா சுற்றுலாத்துறை ஏற்கனவே அழைப்பு விடுத்திருந்தது குறிப்பிடத்தக்கது.
For English News
