January 3, 2017 
தண்டோரா குழு
ஜெயலலிதா தனக்கு வழங்கிய இனோவா காரை அக்கட்சியின் கொள்கைப் பரப்பு துணைச் செயலராக இருந்த நாஞ்சில் சம்பத் செவ்வாய்க்கிழமை (ஜனவரி 3) கட்சிக்கே திருப்பி ஒப்படைத்தார்.
ம.தி.மு.க. கொள்கை பரப்புச் செயாலாளராக இருந்தவர் நாஞ்சில் சம்பத். அக்கட்சியின் பொதுச் செயலாளர் வைகோவுடன் ஏற்பட்ட கருத்து வேறுபாட்டால் 2012 ஆம் ஆண்டு ம.தி.மு.க வி-லிருந்து விலகி அ.தி.மு.க. வில் இணைந்தார்.
கட்சியில் இணைந்த அவருக்கு கொள்கை பரப்புத் துணைச் செயலாளர் பொறுப்பை வழங்கினார் முன்னாள் முதல்வர் ஜெயலலிதா. அப்போது அவரது பிரசார பயணத்துக்காக இனோவா காரைப் பரிசாக வழங்கினார். இந்த காரில் நாஞ்சில் சம்பத் அ.தி.மு.க. பிரசார கூட்டங்களுக்குச் சென்று பிரசாரம் மேற்கொண்டார்.
“கடந்த 8 மாத காலமாக பிரசாரம் எதுவும் இல்லை. அதனால், கார் பயன்படுத்தப்படாமல் நின்று கொண்டு இருந்தது. இதனால் அந்த காரை இன்று நண்பர் மூலம் அ.தி.மு.க. தலைமை கழகத்தில் ஒப்படைத்து விட்டேன். இந்தக் காரைப் பரப்புரைக்கு மட்டுமே பயன்படுத்தி வந்தேன். சொந்தப் பயன்பாட்டுக்காகப் பயன்படுத்தியதில்லை” என்று தெரிவித்தார்.
அ.தி.மு.க. பொதுச் செயலாளராக வி.கே. சசிகலா பொறுப்பேற்றதற்கு அவர் அதிருப்தி வெளியிட்டிருப்பது குறிப்பிடத் தக்கது.
For English News
