July 17, 2017 
தண்டோரா குழு
டி20 உலகக் கோப்பையை வெல்ல காரணமாக இருந்த ஜோகிந்தர் சர்மாவின் தந்தையை இளைஞர்கள் கத்தியால் குத்திய சம்பவம் பெரும் பரபரப்பை ஏற்படுத்தியுள்ளது.
இந்திய கிரிக்கெட் அணி 2007-ல் நடந்த டி20 உலகக் கோப்பை போட்டியில் பாகிஸ்தானுக்கு எதிரான கடைசி ஓவரில், சிறப்பாக பந்து வீசி இந்தியா வெற்றி பெற வழிவகுத்தவர் ஜோகிந்தர் சர்மா. இவர் ஐ.பி.எல் போட்டியில் சென்னை சூப்பர் கிங்ஸ் அணிக்காக விளையாடிவர். ஜோகிந்தர் சர்மாதற்போது ஹிசாரில் டிஎஸ்பியாக பணியாற்றி வருகிறார்.
இவரது தந்தை ஓம் பிரகாஷ் ஷர்மா ஹரியானாவில் உள்ள ரோட்டாக்கில் மிட்டாய் கடை நடத்தி வருகிறார். இந்நிலையில், சனிக்கிழமை இரவு 20 வயது மதிக்கத்தக்க இரண்டு பேர் கடைக்கு வந்து கூல் டிரிங்க்ஸ் கேட்டனர். அதனை குடித்துவிட்டு திடீரென்று அவர்கள், ஓம் பிரகாஷ் சட்டைப் பையில் இருந்து பணத்தை பிடுங்கினர்.
அதனை ஓம் பிரகாஷ் தடுத்துள்ளார். அப்போது ஒருவன் கத்தியால் அவர் வயிற்றில் குத்தினான். வலியோடு அவர்கள் இருவரையும் அவர் பிடித்தார். ஆனால் அவர்கள் கல்லாவில் இருந்த ரூ.7 ஆயிரம் ரூபாயை எடுத்துக்கொண்டு தப்பி ஓடிவிட்டனர்.அதற்கு முன் கடையின் கதவை பூட்டிவிட்டு சென்றுவிட்டனர்.
இதையடுத்து, ரத்தக் காயத்துடன் அவரது இன்னொரு மகன் தீபக்கிற்கு போன் செய்தார். அவர் விரைந்து வந்து கதவை திறந்து ஓம் பிரகாஷை மருத்துவமனையில் சேர்த்தார்.
தற்போது அவர் நலமாக இருப்பதாக தீபக் தெரிவித்துள்ளார்.
For English News
