March 16, 2023 
தண்டோரா குழு
கோவையில் லஞ்ச ஒழிப்பு போலீஸ் கூடுதல் எஸ்பி திவ்யா தலைமையில் 2 குழுவினர் துடியலூரில் உள்ள கோவை வடக்கு வட்டார போக்குவரத்து அலுவலகத்திலும், கோவை மாநகராட்சி கிழக்கு மண்டல அலுவலகத்திலும் நேற்று மாலை 5 மணி அளவில் சோதனை நடத்தினர்.இதில் கோவை மாநகராட்சி கிழக்கு மண்டல அலுவலகத்தில் இன்ஸ்பெக்டர் லதா தலைமையிலான குழுவினர் சோதனை நடத்தினர்.
சோதனையின் போது மாநகராட்சி கிழக்கு மண்டல அலுவலக நுழைவு வாயில் மூடப்பட்டது. மேலும் உள்ளே இருந்தவர்கள் வெளியே செல்ல அனுமதிக்கப்படவில்லை.அதேபோல் வெளியே இருந்து யாரும் உள்ளே செல்ல அனுமதிக்கப்படவில்லை.அலுவலகத்தில் இருந்தவர்களின் செல்போன்கள் சுவிட்ச் ஆப் செய்ய அறிவுறுத்தப்பட்டனர்.
இதையடுத்து லஞ்ச ஒழிப்பு போலீசார் அலுவலகத்தில் உள்ள ஒவ்வாரு அறைகள், மேஜைகள், குப்பை தொட்டி, ஓய்வறை உள்ளிட்ட அனைத்து இடங்களிலும் சோதனை செய்தனர். அப்போது வரி வசூல் அலுவலகத்தில் கணக்கில் வராத ரூ.60 ஆயிரம் பணத்தை பறிமுதல் செய்தனர். இந்த பணம் தொடர்பாக அங்கிருந்த ஊழியர்களிடம் தொடர்ந்து விசாரணை நடத்தி வருகின்றனர்.இதேபோல் கோவை வடக்கு வட்டார போக்குவரத்து அலுவலகத்தில் ஒரு குழுவினர் சோதனை செய்தனர்.
இந்த சோதனையில் அங்கிருந்து கணக்கில் வராத ரூ.13,500 லஞ்ச ஒழிப்பு போலீசார் பறிமுதல் செய்தனர். இதுதொடர்பாக அங்கிருந்தவர்களிடம் தொடர்ந்து விசாரணை நடத்தி வருகின்றனர்.கோவை வடக்கு வட்டார அலுவலகம் மற்றும் மாநகராட்சி கிழக்கு மண்டலம் ஆகிய இடங்களில் ஒரே நேரத்தில் லஞ்ச ஒழிப்பு போலீசார் சோதனை நடத்தி கணக்கில் வராத ரூ.73,500 பறிமுதல் செய்யப்பட்டுள்ளது என்பது குறிப்பிடத்தக்கது.
For English News
