April 10, 2021 
தண்டோரா குழு
கோவை மாநகராட்சி காந்திபுரம் பேருந்து நிலையங்களில் கொரோனா தடுப்பு நடவடிக்கைகள் குறித்து மாநகராட்சி கமிஷனர் குமாரவேல் பாண்டியன் ஆய்வு மேற்கொண்டார்.
அப்போது முகக்கவசம் அணியாமல் இருந்த 15 நபர்களுக்கு தலா ரூ.200 அபராதம் விதிக்கப்பட்டது.மேலும் பேருந்துகளில் பயணிகள் நின்று பயணித்ததால் 4 பேருந்துகளுக்கு தலா ரூ.500 அபராதம்விதித்து மாநகராட்சி கமிஷனர் உத்தரவிட்டார்.
பின்னர் மேட்டுப்பாளையம் சாலையில் தனியார் பெட்ரோல் பங்கில் பணியாளர்கள் முகக்கவசம் அணியாமல் இருந்ததால் அதன் உரிமையாளருக்கு ரூ.5 ஆயிரம் அபராதம் விதிக்கப்பட்டது.
இதனை தொடர்ந்து அப்பகுதியில் செயல்பட்டு வந்த உணவகங்கள், பேக்கரிகளில் பணிபுரிபவர்கள் மற்றும் வாடிக்கையாளர்கள் முகக்கவசம்அணிகின்றார்களா என ஆய்வு மேற்கொண்ட அவர் அப்பகுதியில் செயல்பட்டு வந்த தனியார் ரெஸ்டாரென்டில் வாடிக்கையாளர்கள் முகக்கவசம் அணியாமல் இருந்ததால் அதன் உரிமையாளருக்கு ரூ.1000 அபராதம் விதித்தார்.
இந்த ஆய்வின்போது செயற்பொறியாளர் ரவிச்சந்திரன், உதவி செயற்பொறியாளர் கருப்புசாமி, மண்டல சுகாதார அலுவலர் ராதாகிருஷ்ணன் மற்றும் பலர் உடன் இருந்தனர்.
For English News
